როგორც ანიმაციების დიდმა მოყვარულმა არ შემიძლია არ გაგიზიაროთ ჩემი შთაბეჭდილებები და შეფასება იმ არაჩვეულებრივ ნამუშევარზე, როგორიცაა 'ზღვის სიმღერა' ('Song of the Sea'). თუ თქვენ გგონიათ, რომ მხოლოდ 'დისნეის' შეუძლია მაღალი ხარისხის ანიმაციური ფილმის შექმნა ძალიან ცდებით. თუ გგონიათ, რომ მხოლოდ იაპონელების ძლიერი მხარეა ღრმა შინაარსისა და მისტიური ნამუშევრების წარმოება, აქაც ცდებით. ამ ირლანდიურ ნამუშევარს ყველაფერი აქვს იმისთვის, რომ ერთ-ერთი საუკეთესო ანიმაციური ფილმის სტატუსი ქონდეს და დაწვრილებით გეტყვით რატომაც. მაშ ასე, თუ გსურთ კიდევ ერთ ჯადოსნურ, საინტერესო და მშვენიერ სამყაროში მოგზაურობა მაშინ, "ზღვის სიმღერას" უნდა უყუროთ ნამუშევარი იმავე სტუდიას ეკუთვნის, რომელმაც 2009 წელს "The Secret of Kells" გადაიღო, რომელიც არანაკლებად მომაჯადოვებელი ფილმია თავისი დრუიდული მითების ელემენტებით, ქრისტიანული რწმენით და კელტური სიდიადით. და როდესაც ეს სტუდია, ხუთწლიანი მუშაობის შემდეგ, თავის მეორე ფილმს დებს დარწმუნებული უნდა იყო, რომ რაიმე განსაკუთრებულად ჯადოსნურს იხილავ. ზოგადად ფილმების და განსაკუთრებით ანიმაციური ფილმების შეფასებისას კრიტიკას არ ვიშურებ ხოლმე, თუმცა "ზღვის სიმღერა" ამ შემთხვევაში გამონაკლისია. ამ ფილმის შედარება მხოლოდ ჰაიო მიაძაკის ნამუშევრებთან შემიძლია იმიტომ, რომ არ არსებობს ანიმაციური ფილმების სხვა შემქმნელი, რომელიც ასეთივე გულწრფელი და სერიოზულია თავისი ფოლკლორის და კულტურის მიმართ. მიაძაკის ნამუშევრები გაჯერებულია სულიერი ფანტაზიებითა და მშობლიური ქვეყნისადმი სიყვარულით, ხოლო "ზღვის სიმღერის" შემქმნელი ტომ მური უფრო დასავლურ საფუძვლებით გვევლინება და თავის ირლანდიურ მითებს და კულტურას მჭიდროდ აკავშირებს ყოველდღიურ ცხოვრებასთან. მისი ისტორიები მისტიკურობის და აწმყოს იმდენად საუცხოო ნაზავია, რომ მაყურებელს გაჯერებს თითქოს ეს ყველაფერი ნამდვილია. სირშას და მისი ძმის, ბენის მოგზაურობის ისტორია კლასიკური მიმდევრობით ვითარდება. თხრობის მანერა მშვიდია და არ ცდილობს რაიმე ზედმეტი მოქმედებებით მიიქციოს ჩვენი ყურადღება. თითოეული მოქმედება და ზოგადად, სცენარის განვითარება არის ძალიან ორგანული და ბუნებრივი. ვიზუალური ეფექტები უბრალოდ არაჩვეულებრივია, ლამაზი მარტივი დიზაინით და კელტურ ფესვებთან ძალიან ახლოს. იშვიათად თუ ნახავთ ანიმაციურ ფილმს ასეთი სათუთი და მშვენიერი ნახატებით. "ზღვის სიმღერა" კიდევ ერთხელ გვარწმუნებს იმაში, რომ 3D ანიმაცია სულაც არ რის საჭირო მაღალი ხარისხის დასადებად. ამ ანიმაციის კიდევ ერთი გამორჩეული ნაწილი მისი მუსიკაა. მუსიკა, რომელიც შეუძლებელია არ შეგიყვარდეთ, ან ოდესმე დაივიწყოთ. ალბათ ძალიან დიდი ნიჭი და მონდომება სჭირდება ასე ორგანულად შეუთანხმო ერთმანეთს მაგიური ანიმაცია და მასზე კიდევ მეტად ჯადოსნური მუსიკა. თუ თქვენ ფილმის ინგლისურად ყურებას გადაწყვეტთ აუცილებლად დააფასებთ გამხმოვანებლების ოსტატობასაც. თითოეული მსახიობი, რომელიც არაჩვეულებრივად ირგებს როლს შერჩეულია ნიჭის და არა მათი პოპულარობის მიხედვით. მსგავსი მიდგომა ძალიან ბევრ რამეს ამბობს ანიმაციის შემქმნელთა დამოკიდებულებაზე მათი ნამუშევრის მიმართ. სიმართლე, რომ ვთქვათ "ზღვის სიმღერამ" სალაროების შევსებით ჰოლივუდის სტანდარტები ნამდვილად ვერ დააკმაყოფილა, რაც ერთის მხრივ სამარცხვინოცაა და სასიხარულოც. სამარცხვინო იმიტომ, რომ მსგავს სულში ჩამწვდომ ნამუშევრებს ჰოლივუდი დიდად არ სწყალობს და სასიხარულო იმიტომ, რომ სწორედ ასეთი დამოკიდებულება კიდევ ერთხელ გარწმუნებს, რომ უყურებ რაღაც განსაკუთრებულს და არა მასაზე გათვლილ, გასამდიდრებლად შექმნილ პროდუქტს. ბოლოს კი გეტყვით, რომ როგორც ზღაპრებზე, მითოლოგიაზე, ანიმაციებზე და ხელოვნებაზე შეყვარებული ადამიანი გულით ვნატრობ, რომ ოდესმე საქართველოშიც შეიქმნება მსგავსი მისტიური, მშვენიერი და დასამახსოვრებელი ანიმაციური ფილმები, რაც ჩვენს კულტურას გაამდიდრებს და სხვა თვალით დაგვანახებს.